الرئيسية | أمومة | وعد أية اللى أنت جاى تقول علية !

وعد أية اللى أنت جاى تقول علية !

madres exhaustas

بقلم: مروة كامل

مين مننا مسمعش الكلمة دى من مامتة “لما تكبرى أولادك هيعملوا فيكى زى ما أنتِ بتعملى فيا” . الجديد بقى ان ياريتها تيجى عاللى كونا بنعملة ده أنا اتمنى إنها ترسى على كدة، طبعا مكناش عارفين أن اللى مستنينا (أفظع و أبشع و أشنع) ! فين أيام البصة و التبريقة بتاعة أمي اللى لما كانت تبصها كان الواحد بيتبل وهو واقف مكانة.

عايزة أحكيلكم عالىحاجة بمناسبة أيام زمان ” مرة كنا قاعدين فالنادى و ابنى كل شوية يجى ياخد فلوس و يمشى و بعدين انا زهقت و قربت افلس و مش قادرة ازعق قدام الناس فقلت ابرق لة يمكن يخلى عندة احساس و يفتكر التوصيات اللى قولتها لة قبل ما ننزل م البيت و اللى طبعا اتمسحت و اتبخرت قبل ما ننزل و دخلت من ودن و طلعت من التانية لقيتة بيقولى بصوت عالى مالك يا مامى بتبصيلى كدة لية انت عينيك و جعاكى ولا اية …..”

ودى طبعا حاجة بسيطة من اللى حاولت اعملة من تربية زمان، دلوقتى لو أبنك طلب منك فلوس و قولتى مش معايا تلاقية بيقولك لأ معاكى فـ الشنطة كتير أنا عارف ….!

فين أيام لما بابا كان يدخل ينام و البيت كأن اللى فية هاجروا من كتر ما البيت هادى (دلوقتى العيال يطلعوا يقفوا عالسرير و يتنططوا لحد ما النوم يطير من عين باباهم ) فين أيام ماكنا قبل ما ندخل نستحمى لازم نسأل البيت كلة لو فى حد عاوز يدخل الحمام ولا لأ (دلوقتى العيال يدخلوا يلعبو فالبانيو بالساعات لحد ما حتبقى حتعمليها على نفسك ) و مفيش فايدة …

وكنا بنقول لمامتنا حضرتك ، مرة قولت لبنتى عيب تقوليلى انت قولى حضرتك لقيتها بتقولى (انت حضرتك ) وكأنها لو قالتلى حضرتك من غير أنت مش ح اعرف انها تقصدنى أنا . !

دلوقتى العيال يشخبطوا عالحيطة ولما تسالى مين اللى عمل كدة كلهم يقولو  انا..انا و كانها حاجة حلوة.

و بعدين الوعد اللى بنوعدة لولادنا بتاع (لو قولت الصراحة مش حتتعاقب ولو كذبت حتتعاقب)، أتارينى أنا اللى حاتعاقب بالوعد دة لان العيال المفاعيص دول استغلوا الحكاية دى و بقوا يعملوا المصيبة من دول و ييجوا بكل بساطة من غير لا خشى ولا أدب يقولولك أنا عملت كذا. (اقولكم على حاجة انا نفسى ارجع فالوعد دة بس مش عارفة)..!

يعنى ببقى عاوزة أطبق فرقبة بنتى لما تيجى تقولى انها كسرت لى المكياج و هى بتلعب كوافير المكياج اللى كلة ماركات عالمية و اللى دافعة فية دم قلبى (دة يعتبر ثروة قومية )يا ناس.

ولا أبنى و هو جاى يقولى انة حب يلعب لعبة البنك و اخد كل الفلوس اللى في شنطتى و قطعها علشان تبقى فلوس كتير.

طبعا كويس اوى بعد كل دة انى عايشة و منتحرتش وربنا يسلم فـ اللى جاى (و ابقوا اسالو عليا) .

popupsunsense