الرئيسية | كلام ايف | لايف ستايل | نصائح هامة لأختيار مصور زفافك بذكاء

نصائح هامة لأختيار مصور زفافك بذكاء

Screenshot_2

إن إنفاق المال على مصوّر جيد لحفل زفافك يستحق البذخ، والحصول على شخص موهوب سوف يساعد على التقاط اللحظات المميزة، فما من شيء أجمل من العودة الى الصور والقدرة على إعادة إحياء ليلة العمر، لذا نقدم لكِ بعض النصائح الهامة لأختيار مصور زفافك بذكاء.

عاوزة مصور شاطر….

كل عروسة و هي بتجهز لفرحها بتكون نفسها في احلى و افضل حاجة في حدود الامكانيات المتاحة. و اكبر صعوبات بتواجهها هي الميزانية و الاختيار المظبوط. و برغم اهمية كل التفاصيل في الفرح لكن بيفضل للمصور الاهمية القصوى لانه بيكون العين اللي بتلقط و تحافظ على اليوم ده بكل تفاصيله و مشاعره و مواقفة و ذكرياته. و السؤال المنطقي هو ازاي اختار مصور الفرح بتاعي خاصة مع زيادة عدد المصوريين في مصر بشكل ملحوظ.

السعر

اول عامل مهم جدا في تضيق الاختيار هي السعر. فيه ديما كذا اختيار يناسب كل ميزانية. لو مش عارفة تحددي الميزانية ازاي بينصح الخبراء ان ميزانية المصور تكون ١٠٪ من اجمالي اللي هتدفعيه في الفرح. طبعا بتختلف من عروسة لعروسة.

فيه ناس بالنسبة ليهم التصوير اهم حاجة و ساعتها ممكن يزودوا شوية عن النسبة ديه علشان يضمنوا الصور تطلع في مستوى توقعاتهم و فيه ناس العناصر التانية اهم و الصور بس مجرد ذكرى مش مهم اوي تكون جامدة و ساعتها ال١٠٪ كنسبة تكون معقولة و ممكن تخفيضها ل٨٪ لكن مش اقل من كده ابدا.

 

ستايل

الستايل كل مصور ليه ستايل او طريقة خاصة بيه بتميزه عن اللي حواليه. طبعا في مصوريين جداد بيقلدوا المصوريين الاقدم لكن الغالب ان كل واحد بيخلق لنفسة طريقة و روح معينة بتميز صورة بحيث تقدر تميزها من اول نظرة. و ديه واحدة من اهم عوامل اختيار المصور.

اختاري ستايل يليق على شخصيتك و شخصية عرسيك. مينفعش تكونوا شخصيات بتحب الهزار و التنطيط و تختاروا مصور كلاسيكي او العكس, لو بتحبوا الابداع و التجديد متختاروش واحد افكاره متكررة او لو في فرحك هيكون طراز ملوكي و كلاسيكي مينفعش المصور يكون مطرقع. لازم تختاري الاسلوب الانسب ليكي و يليق مع شخصيتك و مع ستايل الفرح.

اليديتنج

الايديتنج برده من العوامل المهمة جدا اللي بتفرق مصور عن التاني. فيه مصورين بيحبوا في الايديتنج يعملوا الوان بهته او الوان جامده او يلعبوا في الصورة بشكل كبير يخلي الوش املس اكتر من الطبيعي مثلا و فيه مصورين بيكتفوا باقل ايديتنج و بيعتمدوا على الصورة في شكلها الاصلي علشان تعكس الواقع و تحافظ لى الذكريات زي ما كانت. في مصورين عندهم فريق متخصص في الايديتنج شغلهم بس تطوير و تلميع و تحسين الصور و فيه مصوريين بيعملوا ده بنفسهم.

كل حاجة ليها ميزات و عيوب. مثلا اللي بيعمل ايديتنج بنفسه بيكون عاش اللحظة و هو اللي اخد اللقطة فيعرف يطورها و يظهرها بشكا اوضح لكن الثمن لده انه عادة بيتاخر في تسليم الصور و هكذا. و انتي بتختاري شوفي الايديتنج اللي بيعجبك و في كل الاحوال بننصح انك تتجنبي المصور اللي بيعتمد على الايديتنج الجامد اللي بيفقد الصورة طبيعتها. الموضة في الايديتنج بتختلف و انتي مش عاوزة تبصي على صور فرحك بعد ١٠ سنين و تحسي ايه اللي انا عاملته ده.؟

الخبرة و الدراسة

الخبرة بتلعب دور مهم جدا في شطارة المصور. لكن مش اي خبرة, لازم تكون الخبرة في الافراح و في التصوير الحديث. و برغم اهمية الخبرة تيجي اهمية الدراسة كدعم رئيسي للمصور. لازم يكون دارس اللي هو بيعمله و ده الفرق الرئيسي بين مصور هاوي و مصور محترف. المصور المحترف دارس التصوير و معاييره و اصوله و الضوء الزوايا و الخدع البصرية و الضوئية و التقنية المتاحة في الكاميرا المستخدمة و ازاي يستفيد منها في الفضل شكل.

لكن المصور الهاوي هتلقيه بيصور بتلقائية و بيعتمد على الحظ او انه هيعمل ايديتنج للصور علشان يظبط الاضاءة و هكذا. مهم جدا لو انتي مهتمة ان الصور تكون على اكمل وجه انك تختاري مصور محترف بالمعنى الحقيقي. لازم يكون عنده العلم و الخبرة مش بس بيدج على الفسيبوك فيها صور كويسة. و افتكري ان مش كل مصور معه كاميرا محترفة هو مصور محترف.

الشخصية

تفضل اخر و اهم حاجة على الاطلاق و هي الشخصية. المصور بتاعك ده هيكون رفيقك يوم الفرح معاكي في كل خطوة و هيلقط كل حركة و ضحكة و رقصة و دمعة و نظرة و مسكة ايد. لو انتي و هو شخصيتكم مركبتش على بعض الصور هتطلع وحشة.

لو هو محترف ( بجد محترف مش بس معاه كاميرا كويسة) هياخد لاقطات حلوة و مظبوطة و كل حاجة بس انتي مش هتعجبك علشان هتشوفيها من نظرة انه كان غلس و مش ظريف و هكذا. و لو انتوا شخصياتكم ظبطت مع بعض هتحسي انه اخد الصور اللي انتي بتحلمي بيها كانه كان بيقرا افكارك. لازم تقابلي المصور على الاقل مرة قبل الحجز.

لازم تتاكدي انه بالنسبة ليكي لطيف. مش مهم اسمه قد ايه مشهور. المهم بالنسبة ليكي يكون مريح. و افتكري ان المصور في ايده روح الفرح هو اللي بيلم الناس و بيلقط اجمل اللحظات. اخيرا اهم نصيحة اختم بيها لكل عروسة مهتمة قوي بصور الفرح. اعملي جدول بالصور اللي مش عاوزة ابدا تنسيها و اللي طول عمرك بتحلمي بيها و اللي نفسك جدا ان المصور بتاعك يلقطها و اديها للمصور قبل الفرح بكام يوم و اكدي عليه تاني قبل الفرح بيوم و هو هيكون اسعد مصور انه يحقق حلمك .

و متنسيش اضحكي علشان الصورة تطلع حلوة.

popupsunsense