الرئيسية | كلام ايف | لايف ستايل | عن الهوس بالتفاصيل الصغيرة

عن الهوس بالتفاصيل الصغيرة

FM-500x330
كل واحدة مننا عندها هوسها الخاص بيها، ( الهوس بالتفاصيل) أو شيء شغوفة به وبتتفاعل معاه طول الوقت، وبتاخد بالها منه مهما كان تأثيره قليل، بيعدلّها مزاجها، أو بيبهجها من غير سبب، بيخرجها برة المود والروتين والأفعال اللي بتتكرر طول الوقت.
فيه مننا مهووسات بالشوبينج وطول الوقت بتشتري حاجات، ومن المعروف إن الشوبينج بيحسن المزاج عند بعض البنات، وأنا منهن. وفيه بنات بتستمتع بفعل الشراء نفسه. وفيه مننا مهووسات بالميكاب وألوان الموضة ومتابعة المجلات وعروض الأزياء وآخر ماركات مستحضرات التجميل وبتستمتع بكده جدًا، وفيه كتير برضو مهووسات بنوع معين من المزيكا لما بتسمعها بتتفاعل معاها وتعيّشها مود لطيف بتحب تكون جواه، واللي مهووسات بالسينما واللي مهووسات بقصات الشعر، المهم إن كل واحدة مننا ليها حاجة من دول وبتعملها وهي بتحبها.
النهارده هتكلم عن هوسي الشخصي بالتفاصيل، أنا مهووسة بالتفاصيل الصغيرة والدقيقة، مهووسة بالأشياء اللي مش ناس كتير بتاخد بالهم منها، الكلمة اللي بتخفف عن حد أو تضايقه وسط كلام كتير.. بطبطبة الإيد بسبب وبدون سبب، واللي بتهون ع الناس لحظاتهم أو بتديهم إحساس بالدفء والأمان، بحركة النسيم الخفيفة على وشوشنا لما النور يقطع وتيجي نسمة هوا ترطب علينا وتلعب معانا، ورغم إننا بنكون متضايقين بس بنبتسم، بنور الشمس اللي كل يوم تطلع في ميعادها تحضننا بنورها ودفاها وتروّح في معادها وإحنا متأكدين إنها جاية تاني بكرة في نفس المعاد، وبصوت المية الخفيف في جدول صغير وقت اكتمال القمر، مهووسة بكلمة “معلش” اللي بتتقال وقت الزعل عشان نعرف إن اللى قدامنا مهتم بزعلنا فنصفى، وبالبراح اللي جوّة البيوت القديمة، والسكن في قلوب الناس، مهووسة بحبات التراب اللي بشوفها وبجري أمسحها، وهوسي بالمساحات واحترامنا ليها، بإن الحاجات تفضل في أماكنها مهما استخدمناها، بحركة الهوا اللي بيطيّر شعري وبحركة الشجر الأخضر في الشتا وقت المطر، زي رقصة حلوة بترقصها بنت حُرّة.
مسلسل زي “سجن النسا” ومخرجة زي كاملة أبو ذكري بيرضوني جدًا، بيرضوا شغفي بالتفاصيل الدقيقة وبالحاجات الصغيرة اللي بتكمل صورتي الذهنية عن الأشياء.
بس زي ما أنا بلاقي حاجات ترضي شغفي بلاقي حاجات تضايقني فيه، اهتمامي بأدق أدق التفاصيل مش كل الناس حواليّ بتفهمه، ساعات بيسمّوه وقوف ع الواحدة، أو حتى فراغ وفضا، وعلى قدر ما بفرح إني بلاقي ناس زي ندى صاحبتي تشاركني حبي للتفاصيل، على أد ما نفسي الناس الباقية تقدّر ده فيّ ويقبلوني زي ما أنا، عشان تكمل المتعة ويكمل التفاهم.

popupsunsense